الشاب بيرقص عالتربيزه والفلوس نازله عليه ...وهيصه..ادى اخره

[/center
ربنا اراد انى اركب عربيات الميكروباصات اللى على السريع طريق مصر اسكندريه الزراعى ... لما ركبت اتعرضت لشخصيات غريبه جدا وفكر جديد جدا..ما تيجوا نشوف الناس دى بتعمل ايه

اول ما وصلت الموقف فى رمسيس سألت على العربيات اللى رايحه البلد اللى انا عايزها...لقيت تباع من بعيد بيقول اسم البلد...رحت رايح للسواق لقيته واقف جنب الباب...بقوله رايح فين يا اسطى
قالى عفشوا... قلت له يرحمكم الله ..انا بقولك رايح فين ...بحلق فى وشى وادانى احساس انى غبى وقال ...عفشوا
طبعا فضلت مبحلق له لحد ما التباع بصلى وقاللى اسم البلد...
المهم ما دقتش كتير وخاصه ان السواق كان شكله غريب..كان رفيع جدا وشكله كبير ..وتانى ظهره ونافخ ريشه ..عامل زى محمد نجم ايام زمان:
ركبت العربيه وطلعت ..اول ما طلعت والاقى البيه السواق ...واحنا فى وسط زحمه رمسيس ..راح عاكش الدركسيون حته عكشه ..,وضرب غرزه من اللى بالى بالك فى وسط العربيات..خلى حوالى 4 او 5 عربيات عملوا فرامل فجأه..وراح واحد منهم مطلع دماغه وزعق
راح السواق الجميل بتاعنا راح سايب الدركسيون كله ومطلع دماغه من الشباك وواقف ...وبزعيق ..ما بتعرفوش تسوقوا بتسوقوا ليه...
احنا طبعا شفنا المنظر ..البيه ساب الدركسيون ..وبيبص ورا ..ومنفعل تماما ...فى وسط الزحمه ..وقلبنا وقع فى رجلنا..نحاول بقه نقول له يا عم خش من الشباك..العربيه ماشيه...وده ولا هنا...لحد ما واحد من الركاب فهم الدنيا ماشيه ازاى
قال له يا عم خش وسيبك منه ...ده سواق حمار ..خلينا نلحق نوصل عشان تعملك لفه تانى
راح الراجل خش بعد ما كان مدلدل نصفه من الشباك..وقعد يزعق ويقول ..عندك حق يا بيه ..دول ناس بهايم ...مش عارف بياخدوا الرخص ازاى دول ..بصراحه ده اللى فهمته من الكلام...بقيه الكلام ماركه ..دول لازم ينتشتمروس...ما عندهمش بسينروكا..عايزين نتسمرنئوس عال سرتنتمونى

طبعا فضل خمس دقايق يقول كلام ما فهمتش نصه ..قلت جايز ألدغ ولا حاجه
الراجل طلع من الزحمه وخش عالسريع
هو طلع من هنا ..,ابتدا بقه...ماشى على حوالى 140...يا عم هدى السرعه شويه...يقول له الراجل ...سلبؤه
اعتبرناها حاضر.....هدى شويه ..دقيقتين بالضبط..وراح شارخ...يا عم الحج...هدى السرعه شويه ...وده قعد يقول كلام حوالى 3 دقايق..محدش فينا فهم كلمه

قلنا بقه سيبك من السواق ...راح راجل سأل التباع...هو شارب حاجه...لا والله ..هى سيجاره الحشيش بس
الراجل قال له بس ...بسيطه ..افتكرته شارب حاجه...
المصيبه ان التباع بيتكلم بكل وضوح...والراجل بيرد بكل برود ...الظاهر انى مش عايش فى البلد دى

السواق ماشى على حوالى 140 وكل شويه ..يدى غرزه من اللى بالى بالك فى وسط العربيات...والاقى بقه الميكروباص الناس اللى فيه..اللى بيقول الشهادتين ...واللى بيقرا قران...واللى بيقول للتانى ..قلت لك تعالى صلى معايا الظهر وما ردتش تيجى

الظاهر ان التباع حس بالقلق ...حب يهدى السواق..راح مطلع له شريط..وقال له حطلنا ده ..وروق كده
قال له السواق ..مش سامع كل شويه يقولوا هدى...عايزين نلحق الوايلى كمان نصف ساعه...
يا نهار اسود...عايز يوصلنا عالسريع ..ويرجع القاهره ...ويروح الوايلى فى نصف ساعه...انا قلت الراجل ده فى برج لاسع فى مخه ربنا يستر علينا

الشريط اشتغل ..وافاجأ بشريط كوكتيل اغانى غريب ..
واحد قاعد يغنى للعنب مثلا
العنب العنب العنب...احمر ودمه خفيف..العنب
والسواق بقه فى دنيا تانيه...
قاعد يترقص فى الكرسى ....وكل ما تيجى العنب العنب العنب..الاقى السواق شال ايده من عالدركسيون وبيهزهم...ويميل ورا عالكرسى ..كأنه بيميل على راقصه
كل الكلام ده على سرعه 140

الناس بقه ابتدت تتكلم..الراجل ده شكله مجنون يا جدعان...بص بيرقص ازاى ...واحد تانى ذكى بيقول له ..ويا ريت بيعرف يرقص ...
واحد يقول للتانى..بس دماغه عاليه قوى...ابن اللذينه واخد صنف نضيف
واحد تانى...ايه اللى ركبنى انهارده...ادى اخره التزويغ من الشغل بدرى

فى الوقت ده ..2 من الركاب نزلوا فى نصف الطريق..وصلوا محطتهم.....
وهما نازلين بقه...ده راجل ابن.. ربنا يكون فى عونكوا..الف سلامه ياجدعان
وواحد من الراكبين ..يا بختكوا يا عم..نزلتوا خلاص

طلع التباع ركب جنب السواق

الاغنيه اتغيرت ...والاقى اغنيه تانيه بقه
وكعبوا كعبوا.....والاقى 2 من الركاب ..بيردوا ...كعبوووووووووووو
حبيبى وانا الاعبه ....كعبووووووووووو
والناس اندمجت قوى..ونسيوا الدنيا كلها بقه
حبيبى وانا العبه ....اوباااااااااااا
يا كعبوا كعبوا ....يا واد ما تلعبووووو ...كعبووووووووووو

بصراحه انا لحد كده وكنت جبت جاز....راكب انا ميكروباص مجانين
السواق محشش...والتباع مش فى دماغه...والناس نازله ترقص
الراجل اللى جنبى اندمج جدا فى اغنيه كعبوا ..لدرجه انه كان بيمد بوزه قوى ...وهو بيقول كعبه ...عايش الاغنيه يا جماعه
ودى شغاله...قربت منه كده شويه ..الحب عايز الملاغيه....راح قال لى فين الحنيه..يا كعبوا كعبوووووو...كعبووووووو...يلا بينا نلاعبه

وكل ده والسواق سايب الدركسيون وقاعد يهز فى كتافه ..يطلع للامام ..ويرجع لورا فى الكرسى ...والناس نسيت بقه اللى بيحصل ...وتحول الميكروباص لملحمه كعبه

خمس دقايق فى كعبوا ..والمغنى بعد ما خلص قدم شكره للحج شعبان عبرحيم...وذكر اهل عيلته واهل حتته...زى مطربين الافراح...مغنى محترم جدا

خلصت كعبوا...والاقى هيصه:
مش هيصه يعنى دوشه ..هوه كله دوشه ...دى اغنيه اسمه كده لا مؤاخذه
والميكروباص اتقلب فعلا هيصه
وهيصه ..هيصصصصصصصه...الشاب بيرقص عالتربيزه والفلوس نازله عليه...والركاب بقه من وره ...يردوا ...هيصصصصصصصصصه

طبعا فى وسط الملحمه دى...انا حسيت انى جاهل ...مش مساير العصر..الركاب كلهم حافظين الاغانى ..وانا جاهل ...معنديش حس فنى...لا عارف ارد واقول كعبوا ...,ولا حته هيصصصصصصصصصه

ولقيت الراجل اللى جنبى بيبص لى ..بازبهلال...عايز يقولى ما بتردش ليه ورا الاغنيه
رحت باصص له بكل براءه وقلت له ...هييييييييييييييييصه:

فى نصف الاغنيه الواد التباع كان نايم على نفسه..السواق بقه مندمج ولمح ده مش بيغنى...اول ما خلصت الفلوس نازله عليه..والاقى ده رقع التباع حته قفا..من اللى قلبك يحبه....لقيت التباع صحى فجأه وهو بيقول هيييييييصه

الحمد لله وصلنا بسلامه ..بس السواق نزلنا على بعد 500 متر من الموقف...وقالنا معلش يا جماعه...اصل انا مش من الخط ده ..ولازم الف وارجع قبل ما اتمسك

طبعا الناس نزلت من الميكروباص ...وهى بتقول لبعض ..يا عم انزل مش مشكله..المهم اننا وصلنا ..واللى يقول للتانى ..حمد الله عالسلامه..ده احنا انكتب لنا عمر جديد يا راجل..

وانا نزلت فاتح بقى ..وبغنى ..عاللى بيحصل لى عاللى بيجرالى ...وقعدت نصف ساعه بجد..بحاول اخرج من راسى كلمه هييييييييييييييصه

[/right]

يبقى انت اكييييييييييييد اكيييييييييييييييييد فى مصر

فعلا يبقىانته اكيد فى مصر
طيب اناكده على ول
ببقى خايفه اول ما اركب واتشاهد على نفسى

ااااااااااااااااااسلام
اااااااااااسلام
ميرا هى اللى ردت مش انااااااااااا
هتزعل البونية مننا ولا ااااااااااااااااااااااااااااااية
عارفة طبعا عشان مطلعة عينك وبتكع بسببى كتير اوووووووووى مع نور بس معلش بقااااااااا
غلاااااااااااااااااسة

على فكرة انا بقرف من الاغانى دية وحصلت مرة وكنا مسافرين اسكندرية والراجل شغل النوعية دية حكمت على اخويا يديلة شريط مخصوص من الماستر بتوعة عشان يغير الارف دة
ولا يمكن اسمع الحاجات دية
بس بصراحة انا حسة بالموعاناة بتاعتك عشان كتير اوووووووووى بمر بيهااااااااا

ههههههههههههههههههههههه
انا حصلى كده من فترة
بس الاغنية كانت
اديك تقول مختش يا ناكر الجميل
وان شوفت تقول مشوفتش متشكرين يا اصيل
عمركو شوفتو اغانى كدة

هههههههههههههههههههههههههههههههه
شكرا ليكى يا امل

اه اه اه اه اه اه اه على اللى حصل انهاردة وانا راجع من الشغل...............
الحمد لله انجزت شغلى انهاردة بجدارة وخلاص هروح
ماشى فرحان بقى مروح بدرى
ركبت تاكسى قولتلو الحى السابع...قالى تعالى يا بيه
ركبت ورا .. قالى تعالى يا بيه قدام يمكن نلقط زبونين ولا حاجة
ركبت جمب السواق
قالى شكلك تعبان يا بيه انا هشغلك حاجة تروقك
وفجأة حط الشريط............................اسمع بقى يا سلام اغنية كول اوى.............
اتدحدح روح سينيما العبلك دور دومنا اهو اهو اهو عايز تروح النت اركب سوبر جت
عايزك متركزشى علشان متهيسشى........... المفجأة باقى الاغنية............
لو تشرب يا منيل هتحس انك عيل ........بازازة كونياك الهم هينساك
......وبعد كده لقيته قال....كوكوكوكوكك كوكوكوكك كوكوكوكك
مش عيب لما اتطوع واتمرمغ فى الطين لو تشرب يا منيل هتحس انك عيل
..........اه من اللى حصل بعد كده......مقدرتش استحمل ونزلت عند النادى الاهلى
وقفت ميكروباص وقولت هنزل عند رابعة العدويه
..وركبت...ويارتنى ماركبت,,,,,,,,
ركبت فى اخر مكان ورا وكان جمبى اتنين واخدين نص العربية وانا يا عينى لاحول ولا قوة عصفور بينهم..........
السواق الرايق يشغل اييييييييييييييييييييييييييييييه.........اسمعو..........
قولو قولو قولو قولو قولو قولو قولو قولو قولو
وكأن اللى بيغنى ده لما دخلا الاستوديو لسانه سف ...مفيش الا كلمة قولو ...بيغنى بقاله حوالى ربع ساعة وانا يا سلام قاعد وجامبى سماعة
اه من اللى حصل ده..........انا هشترى عربيه احسن
ربنا يكون فى عونكو

هههههههههههههههههههههههههههههههههههههههههههه

هههههههههههههههههههههههههههههههههههههههههههههههههههههههههههه

كارثه يااسلام بس تصدق لانه الحاجات دى بقت عادى جدا بقينا بنتاقلم معاها
عادى يعنى
اول ماالواد اخويا كان بيسمع الاسفاف ده ويعلى بقى الكومبيوتر ويصحينى من احلى نومه
كنت اقعد اقوله ايه القرف ده انت مبتسمعش
وانت
وانت
وانت
وبعد ماهو بطل
قلت الحمد لله بس اتاري الواد علم عليا
مره كنت راكبه ميكروباص الجلاء الجامعه ده للى من عندنا ف المنصوره يعرفه
ومشغل اغانى قال ايه شعبى
لاقيتنى بردد وراه
ياخبر اسود
انا ايه اللى جرالى
وتخيل مش عارفه ابطل ومجهود بقى عقبال ماعرفت اتعدل
موضوع جامد بجد

كووووووووووووووووووول
اكيد اليوم بالشكل دة انتها نهاية كوووووووووول يا كوووووووووول
انت روحت بدرى ليييييييييييييييييييية انت اللى غلطان برضووووووو
هههههههههههههههه
معلش تعيش و تاخد غيرهاااااااااا


الغسق الدامى
بجد كلنا بنعادى من الموضوع دة جداااااااااااااا خاصتا انك تصحى من النووووووووم على اغنية بالارف دة بصوتهاااااااااااااا العاااااااااالى زى الجرس يالهووووووووووووووى
مشكلة انا ساعات بلعانى منها والله
ربنا يرحمناااااااااا

كوووووووووووووووووووووووووول اشترى عربية ورايح نفس او خدها مشى من الشغل للبيت ومن البيت للشغل

يا جماعه انا مش معاكم خالص لان الاغانى اللى مش عجباكم دى بتمثل فئه من الناس....والناس دى بجد والله غلابه جدا وبيحسوا بمتعه وهما بيسمعوا الاغانى دى لانها بجد بتصور حياتهم زى ما هما شايفينها.....فياريت يا جماعه متظلموهمش وتحكموا عليهم غلط
وبعدين فى امريكا كل فئه من الناس ليهم فن خاص بيهم وما اكثر الوان الفنون اللى موجوده فى امريكا

والله مفيش احلى م الاغانى الطبيعيه

بس فى اغانى شعبى تعبانه

سيبكم منها

شكراااااااااااااا على الموضوع