مطبخ مش زي اي مطبخ

انا حبيت النهارده اضيف الموضوع ده لباب المراءه وقلت افيد منه اخواتي الي مابيحبوش المطبخ يعني ماتعرفش تعمل حاجه او في حاجات مابتعرفيهاش
لان لازم في يوم حتضطري تطبخي وزي مانتوا عارفين اقصر طريق لقلب الراجل معدته دي حقيقة والله ومتجربه يعني عشان اطلب اى حاجه صعبة من ابو العيال لازم اقف في المطبخ ساعتين تلاته
اعمل فيها وليمةههههههههههههه
والمختلف هنا عن اي مطبخ حاجتين:
اول حاجه طريقة العرض.
يعني ايه؟
انا مش حقدم حاجه الا اذا جالي سؤال عليها
تاني حاجه ان الموضوع هنا مافيهوش كسوف يعني اسالي عن اي حاجه في المطبخ من اول سلق البيض ومرورا بتنظيف الفراخ ازاي والى عمل الولائم والاكلات الغريبه وانشاء الله اقدر افيدكم يارب .
واذا حبيتي تسالي عن اي حاجه حتى لو بره المطبخ انشاء الله حتلاقوني معاكم
هاه ايه رئيكم
ملاحظه مهمه عشان الاحراج انا ماليش في الحلويات الغربيه يعني التورت والجاتوهات بقول اشتريها احسن واضمن
فبلاش الاسئلة الصعبة ديةوبما اننا في كفايه الندى احنا ممكن
نعمل الطلبات بيتي وبعد كده نبيع براحتنا واهه مشروع

والله كلامك مظبوت
لوكل وحدة تعرف ان اقصر طريق لقلب الرجل معدة هيلاقو الرجالة بينفزوا اي طلب هي عيزا من الاخر هيكون تحت رجلها هههههههههههه

بصرااااااااااااحة موضوع جاااااااااااامد طحن بجد
على فكرة انا المطبخ اكثر مكان مش بدخلة خاااااااااااااااااااااااالص ولا بحب اطبخ من الاصل
دة فى الغالب هييحطنى فى مشكلة كبيرة مع اللى هرتبط بية خاصتا لو بيحب الاكل
يالهووووووووووى هتبقا كارثة باللحمة المفرومة
بصراااااااحة مليش سؤال عن حاجة معينة دلوقتى
بس سؤالى خاص بالجزء النفسى شوووية
ازاى ادخل المطيخ وانا عااااااااوزة ومش اكون متضررة عشان دخلة المطبخ بصراحة ولدتى حولت معايا كتير ولسة مياستش بس كل المحاولات ادت بالفشل الذريع
ساعدونى لحسن كدة ممكن اطلق بعد شهر من الجواز ان شاء الله
ربنا يستر

شكرا لكم جميعا اسعدتموني يتشجيعكم وانشاء الله من بكره حيدا وطبعا اول حاجه الكبيبه دي اكلتي المفضله ومعلش سامحوني انا ما بقدرش اقعد يوم الجمعه والسبت عشان بتبقى اجازة الولاد وزوجي العزيز وانا معاكم من الاحد الى الخميس انشاء الله شكرا

بجد بجد
ربنا يخليكى ليهم ولينااااااااااااااااااااااااااا
بجد بجد حضرتك تستحقى الام والزوجة المثالية
ربنا يبارك فيكى يا رب

الله الله على كلامك يالميا انت فعلا اللي بنت مثاليه وانا
سعيده وانت معايا وعشان كده حاخدك النهارده ونعمل
حاجات صغيره في المطبخ عشان تحبي المطبخ
اولا :
اوعي تكون اول مره تدخلي للمطبخ لتنظيفه بعد الاكل لان المطبخ بيبقى
متلخبط خالص وشكله ما يفتحش النفس
ثانيا :
حاولي تخلى المطبخ بتاعك زي لوحه جميله كل يوم ضيفي ليها لون يعني في يوم هات فازه وورد جميل
للمطبخ ومره تانيه هات تابلوه صغير وعلقيه
حط منبه وساعه على شكل جميل
ممكن لو بتحبي تسمعي الراديو تاخديه معاك على
المطبخ انا عن نفسي ما بحسش بالساعات اللي
بوقفها في المطبخ وانا بسمع الراديو
حاولي تعملي كده وقوليلي النتيجه وانا معاك لغاية ما
نبدا الطبخ وشوفي اكتر اكله بتحبيها ايه ونعملها مع بعض

بالنسبه لعمل الكبيبه ياحبيبتي يانهر الحنين
المقادير
ا/2 كيلو برغل ناعم ويفضل برغل الضحى
1- كيلو لحمة مفرومه مقسوم على نصفين
يعني كل نص كيلو لوحده
3 بصلات متوسطي الحجم
وحدةجوزة الطيب مبشوره
ملعقة حنزبيل صغيره
ملعقة فلفل اسود صغيرة
ملعقة ملح صغيره
الطريقة
يغسل البرغل جيدا ازاي تضعي البرغل في حله او طبق بلاستيك
وتفتحي عليه الميه لغاية ماتبقى الميه لونها نظيف طبعا مش
حتوصلي للون الماء بس على قد ماتقدري يروح منه العكاره الموجوده فيه بعد كده بايديكي الاتنين تخرجي البرغل من الماء
وتعصريه بين ايديك للتخلص من الماء طبعا شويه شويه
لغاية ما الكمية تخلص
وحطيى في مصفى ناعمه جدا او منخل حرير واتركيه في مكان
جيد التهويه لغاية ما تجف منه الميه تقريبا 3 - 2 ساعات
بعد كده خدي نص كيلو من اللحمه المفرومة واخلطيها مع البرغل وبصله متقطعه (مبشوره) وجوزة الطيب و1/2 ملعقة الفلفل الاسود ياريت الملعقه تكون اصغر حجم زي بتاعت الايس كريم مثلا لو مافيش يبقى النص خليه ربع ملعقة واضيفي الملح
وبرده ربع ملعقة من الجنزبيل لو في عندك مفرمة لحمة يتفرم المقادير مع بعض لغاية ماتحصلي على عجينه متماسكه ما عندكيش مفرمة لحمه ابعتيه للجزار يفرمها
ابشري البصلتين المتبقيتين وضعي عليهم باقي اللحمه
المفرومة وعلى نار هادبه قلبيهم مع باقي البهارات والملح لغاية اللحمه( العصاج) ماينضج
امسكي العجينه وقطعيها على شكل بيضات صغيرة تقريبا الكميه تكفي لعمل 27-30 قطعه او اقل
امسكي القطعه في ايدك وحاولي تفتحيها من الداخل واعمليها زي شكل الكبايه الصغيره وامليها من اللحم المفروم واقفليها جيدا لو ظهرت تشققات حاولي تقفليها وانت ايدك مبلله بالماء وكل ما كانت السمك ارق كل ما كانت الذ واعملي شكلها من الاطراف مثل البيضه مدببه من الطرفين وهكذا لغاية ما الكميه تنتهي انا عارفه اتعب حاجه فيها تشكيلها
بعد كده حطي زيت فى اناء غويط مثلا حله صغيره قديمه عشان ماتبوظشي من الزيت وسخني الزيت جامد وضعي الحبات فيه ووطي النار شويه ومن غير تقليب شويه وبعد ما تحسي ان الجزء اللي في الزيت اتحمر ابدائي قلبيه بالراحه عشان ما تتفتحش من بره وبعد ماتتحمر اخرجيها على ورق نشاف
وبالهناء والعافيه ويفضل اثناء الكل عصر الليمون عليها بيبقى طعمها اجمل

العفو ياحبيبة قلبي انا زي ماقلتلكم ببقى سعيده وانا بقول لاي حد معلومه اعرفها بس يارب تجربي الكبيبه وتعجبك

وانا في الانتظار.........
اسئلتكم فين ؟؟؟؟؟؟؟؟؟؟

شفتوا ماحدش دخل من اسبوع يبقى الكل ما بيحبش المطبخ وده اللي انا بقوله يبقى نلغي الموضوع احسن

لالالالالالالالالالالالالالالالا
نلغى اية بس
انا جربت النصائح بتاعت المطبخ بصرااااااااحة بدات يعنى ابدا احب ادخلة
ربنا يخليكى
خليكى معايا بقا لحد ما يحدث اليوم العالمى اللى اطبخ فية
بلاش نلغى الموضوع بليززززززززز

شكرا لمرورك يالميا وانا سعيده انك دخلتي المطبخ وانشاء الله انا معاكي لغاية ماتعرفي تعملي كل اللي نفسك فيه على فكره بنتي سالي علمتها الطبيخ وهي لسه في اولى اعدادي وبنتي التانيه برده بيعرفوا يعملوا كل حاجه وعشان كده انا عايزه اعلمك يعني زي بنتي زي ما اتفقنا ولا ايه

ايوة طبعاااااا
حضرتك برضو زى ولدتى بالضبط
واكيد اى حااااااااااااجة من حضرتك جميلة وحلوة اوووووووووووووى
اية بقا اللى المفروض يحصل بعد كدة انا لحد دلوقتى بدخل اتفرج خاصتا ان دلوقتى ماما بتعمل الكحك يعنى مش طريقى خااااااااااااااااااااااااااااالص
انا متفرجة فقط
اية اللى المفروض يتعمل طيب؟؟؟؟؟؟

انت عارفه ان المطبخ مش طبيخ بس يعني لو قدرتي دلوقتي تحافظي
على جمال المطبخ تلمعي الدواليب والبوتجاز والحوض وافضل حاجه وانت بتلمعي المطبخ انك تستخدمي
الجوانتي في ايديك عشان تحافظي على جمالهم ونعومتهم لان مواد التلميع بتاذي الايدين جامد وانا افضل
استخدام الكلور وبشكل كبير لان الكلور من خواصه غير ازالة البقع قتل الميكروبات يعني ممكن التعقيم بالنسبه
للادوات اللي بستخدمها لتقطيع اللحوم لان اللحوم بتترك مكانها ميكروبات كتيره جدا وممكن وضع القليل من
الكلور في الاواني التي يتغير لونها مثلا مكان الشاي الكبايات والبراد وبراد التقديم والصواني وكذلك الحوض
انا بقفل الحوض وبفضي نص قزازة الكلور على الرخامه وبعد ذلك الكلور بينزل على الحوض ويتركه لامع جدا
بس وانت بتستعملي الكلور لازم تكوني حريصه جدا في الاستعمال لان الكلور بيزيل الالوان فلو طرطش على
ملابسك انسي انك تلبسيها تاني عشان كده يوم التلميع بتلبسي ملابس مستغنيه عنها وطبعا نفسيتك بترتاح
وانت حاسه ان ادوات المطبخ بترجع جديده بعد غسلها بالكلور كل ادوات المطبخ وخصوصا البلاسيك و
الميلامين والصيني والقزاز بتبان عليها النتيجه سريعا لكن الالمونيوم ما ينفعش معاها الكلور

مرسي على مرورك يانهر الحنين وانا منتظره اسالتكم

بجد بجد
ربنا يخليكى
اكثر حاجة بجد عجبانى فى نصائح حضرتك دية بالخصوص الجوانتى عشان انا بصراحة بقرف جدااااااااااااااااا
ممكن تكملى باقى خطوات ازاى ادخل المطبخ وصولا لليوم العالمى؟؟

هههههههههههه انت تنوري المطبخ والله يالميا ومن بكره انشاء الله ابدا

لنت بتحبطيني يالميا ده المطبخ هو دنية المراءه
اقلك احسن انا اديكي العنوان ونعطيكي درس خصوصي على الطبيعه

موضوعك حلو اوي وليا طلب عندك ممكن تقولي لي طريقة الحواوشي

طبعا ممكم يا سمع بس عذرا مش النهارده عشان انا مش فاضيه عذرا مره اخرى الى اللقاء غدا

بصي ياحبيبتي يا س م ع الحوواشي بقى
نص كيلو لحمه مفرومه ولو بتحبي الدسم تبقي تخلي الجزار يفرم معاها شوية دهنه
ثلات بصلات متوسطة الحجم وطمطمايه صغيره ولو عايزاه حار حطي قرنين فلفل حراق كل ده يتفرم مع اللحمه في الخلاط و نص ملعقه جنزبيل مطحون وفلفل اسود وملح
الكميه دي تكفي 6 ارغفه من العيش البلدي مع ملاحظة ان يكون العيش طري يعني مش محمص
افتحي الرغيف فتحه صغيره من فوق واحشيه باللحمه المفرومه مع ملاحظة انها تكون متوزعه داخل الرغيف ومفروده يعني طبقه رقيقه وهكذا مع باقي الارغفه بعد كده ادهني العيش من بره بزيت عافيه ولفيه في الفويل كل رغيف على حده وحطيهم في فرن متوسط الحراره تقريبا من 15 الى 20 دقيقه وممكن تقلبي العيش على الناحيه التانيه وتتركيه 10 دقايق لو لاقيتيه لسه ماتحمرش وبالهناء والعافيه

شكرا جدا ليكي وان شاء الله هاجرب الطريقة واكيد هتبقى تحفة

لالالالالالالا
انا كدة ممكن اجوع
بجد بجد وصفة حلوة اوووووووووووى تقريبا زى اللى ماما بتعملها وانا طبعا ببقا واقفة اتفرج عليها مش اكثر


امة الله
انتى نسيتى تلميذتك الفاشلة مطبخيا فين باقى الخطوات عشان نصل لليوم العالمى؟؟

حبيبة قلبي انت مدياني احساس انك حتفضلي تتفرجي ابداي وقليلي يوم لا يوم كتير ساعه برده لا 10 دقايق في المطبخ انت عملتي فيها حاجه شجعيني عشان اكملك واعرف انك بتستفيدي

انا جربت الحووشى بقى
تحفففففففففففففففه بجد يا امه الله
ربنا يخليكى لينا

يارب بالهنا والعافيه حبيبة قلبي يارقة الندى

انا اقول لحضرتك
انا كنت الاول بتفرج
بعد كدة بقيت بدخل وارتب المطبخ واعمل فية نيو لوك وساعات ماما بتسيب اللى عملتة وساعات بتعدل فية شوية بس بدون متنقد زوقى
بعد كدة عملت صلصة بس ماما كانت واقفة
بس كدة
دة اكثر جهودى فلى المطبخ

على فكرة بحب الطبخ جدا انا فنانه مطبخ
بس حلو اوى
كده جريت ريق الشباب
جوعتينا
انا عوزة اكل
ههههههههههههههههههههههههههههههههههههههههههههههههههههههه

وانا بقول المطابخ كلها نورت كده ليه عشان العسوله لميا شرفتها انا بحيكي بجد وبرافو عليكي بصي بقى انا عايزه اعلمك طريقة الكول سلو بس بجد لو ما جربتيهاش حزعل ولا احسن ماتكونيش بتحبيها انا استنى اعرف ردك

اهلا بيكي يالقلب الطيب نورتي مطبخي المتواضع ياريت نشوف مساهماتك او اسالتك انا في انتظارك

ايه ده انتي تعرفي طريقة الكول سلو يا امة الله طاب ياريت بجد تقولي الطريقة لاني بحبها بس مش باعرف اعملها

بصي ياحبيبة قلبي
من عند بتاع الخضار حتنقي كرنبه صغيره واياكي والكوبيتشةو لان ده خس صيني شبه الكرنب وطبعا ما ينفعش في السلطه
و2 جزره
و3 او 4 ملاعق مايونيز تقريبا
ونصف كوب عصير برتقال يمكن استبدال عصير البرتقال بنصف كوب لبن مع 3 ملاعق من الخل ولكن الافضل عصير البرتقال
وملعقه ونصف سكر قابله للزياده حسب حجم الكرنب والرغبه
اغسلي ورقات الكرنب جيدا وابداي تقطعيها الى شرائح رقيقه خالص وممكن استعمال مفرمة براون بتاعة تقطيع الخضار حتكون افضل
وابشري الجزر وبعد ذلك ضيفيهم الى بعض مع تقليبهم بالمايونيز يمكن زيادة كمية المايونيز على حسب حجم الكرنبه وطبعا نفس الكلام على السكر يفضل اضافته قليلا وتذوق الطعم وبعد ذلك اضيفي عصير البرتقال

انا على فكرة من كتر حبى للمطبخ مضيعه مصروفى على كتب الطبيخ والحلويات

ههههههههههههههههههههههههههههههههههههههههههههه


المهم ان نتعلم الجديد

بجد شكرا اوى ليكى على المزضوع

اشكرك اسلام على التثبيت وان شاء الله اكون عند حسن ظنك

معلش يا امة الله انا عارفة ان طلباتي كتير و زهقتك بس ممكن لو تعرفي طريقة البيتزا تقولي لي عليها

حبيبة قلبي س م ع انت بتسعديني جدا كل ما الاقي سؤال منك انا فعلا سعيده لان الهدف من الموضع ارد على استفسارتكم
بصي يا عمري انا جربت في البيتزا كتير لان البيت عندي كلهم بيعشقوها
يعني جربت اعمل العجينه في البيت ومش دايما بتظبط
واشتريت البيتزا الجاهزه المجمده طعمها اجارك الله
وطلبت بيتزا هت وطبعا ده كان احلى حاجه بس مكلفه جدا
لغاية مافي الاخر وصلت لطريقه رائعه ومش مكلفه كتير وبنفس طعم بيتزا هت بس بدل ما تجيبي وحده ممكن تعملي 6 بنفس التكلفه
بصي ياستي حتروحي لمخبز العيش الفينو اللي بيعجبك العيش بتاعه وتطلبي منه كيلو عجينة فينو ودي بتعمل 3 صواني متوسطة الحجم
ونبدا في المقادير
كيلو عجينة بيتزا (الفينو)
كيلو طماطم
ربع كيلو فلفل رومي وممكن اضافة قليل من الفلفل الحراق معاه يعني كفايه قرنين لو بتحبي البيتزا اسبايسي
نصف راس ثوم مقشر
بصلتين متوسطي الحجم
ملعقتين كبيرتين من الزعتر المطحون وان لم تجدي مطحون يمكن استخدام الزعتر العادي الموجود عند العطار مهم جدا الزعتر
ملح وفلفل اسود
وطبعا مقادير الحشوه حسب الرغبه
لحمه مفرومه متعصجه تقريبا ربع كيلو
هوت دوج سوسيس مقطع شرائح
بسطرمه
سلامي
جبنه مزاريللا
زيتون شرائح
او اي اضافات اخرى تفضليها
الطريقه
قطعي نصف الطماطم والفلفل كله ماعدا حبتين مكعبات صغيره وبصله شرائح رفيعه جدا وصغيره
رشي قليل من الدقيق على رخامة المطبخ او اي سطح مستوي وقطعي العجينه الى 3 قطع متساويه على شكل كره
واتركيها قليلا حتى تنتهي من عمل الصلصه
ضعي نصف كمية الطماطم مع بصله والثوم وحبتين من الفلفل الرومي في الخلاط
ثم ضعي في الحله قليل من الزيت على النار واضيفي اليها الطماطم المعصوره وملحيها واضيفي الزعتراليها واتركيها على نار هادئه حتى تتسبك تصيح متماسكه وبدون ماء
ابداي في فرد العجينه على شكل دائره بالشوبك الة فرد العجين بنفس مساحة الصينيه اللي عندك ئم ادهني الصينيه قليلا من الزيت وضعي العجينه عليها وابداي بفرد الصلصه على العجينه تقريبا ملعقتين من الصلصه فقط وتكون على شكل غطاء رقيق للعجينه ثم ابداي برش الحشو اللحوم ايا كان النوع ثم غطيها بالطماطم وباقي الخضار والزيتون ومهم تغطي اللحوم لانها بتنشف في الفرن
ودخليها فرن حار جدا على الرف القريب من الشعله وبعد 10 دقائق تقريبا ارفعي طرف العجينه بسكين اذا احمرت رشي عليها الجبن الموزاريللا وادخليها الشوايه لمدة دقيقتين حتر يتحمر الوجه وهكذا مع باقي العجين وبالهناء والعافيه ويارب تعجبك الطريقه

امة الله
حضرتك جبتى جون معايا اووووووووووووووووووووووووى
ان فعلا عملت الكول سلو
بجد بجد اول مرة اكون مبسوطة بحاجة انا عملتها فى المطيخ وكمان واقفة وانا عادى كانى واقفة فى البلكونة ولا حااااااااااااجة
بجد بجد
جربتها وطلعت جميلة والحمد لله

ماشاء الله لميا في المطبخ وبتطبخ لا لا انا مش مصدقه تسلم ايديكي يارب تقدري تجربي البيتزا بس انا عارفه هي صعبه شويه انت ممكن تساعدي في اعدادها

ايوة طبعاااااااااااااااااا
انا ممكن احط الطماطم والبصل والفلفل والحاجات اللى بتطحط فوقيها ااااااااية استاذة ورئيسة قسم
جربينى دية بالنسبة ليا لعبة اصلاااااااااااااااا

ههههههههههههههههه برافو عليك لعبه بردو احسن من بلاش بلاش نطمع

هههههههه
هههههههههههههههههههه
البيتزا دة اصلا من اكلاتى المفضلة جداااااااااااااااااااااااااااا
ماما مش بتشترى العجينة بتاعتنها بتعملها فى البيت وانا بكمل الباقى وبنطلع تجنن والله
ابقا ادوقهلكوا قريب بس لما نعملهاااااااااا
هتكلوا صوابعكوا وراهاااااااااااااا